A KALIMERA. A RÁDIO LIVRE DE COMPOSTELA
ONDINHAS VENHEM E VAM!
Tsunami terra adentro
A começos dos 90 nascia em Compostela A Radio Calimero, já logo A Kalimera, que igual que o polinho negro escachava a casca na procura de justiça no feito comunicativo, democratizar a palavra, apropriar-se dela.
Muita gente desde entóm passou, transitou, ficou e mesmo recuncou na emissora livre da cidade. Ali coletivos autogeridos, associacionismo vizinhal, identidade, lutas comunitárias…; um lugar de aprendizagem desde o todas de todas, de afectos e no que dizer o que tivesses para dizer.
Muitas foram as ruas e espaços de agitaçom polos que neste tempo devalou, sempre desde a proximidade com os lugares de morada: Vite, os barracons do Burgo, a Casa Encantada…, até chegar nos últimos anos á Gentalha do Pichel.
O nosso cu de formiga léva-nos mais umha vez a empreender travessia, e nestas novas ondas vitais surfeamos com quem vive de empréstimo. Descendemos até o CSA do Sar (a Casa do Peixe), onde livres de alugueiro andamos a construir peixeira. Perto do ceo havemos chantar a antena para que as zonas em sombra passem á história e a 107.9 (última na banda mas a primeira nos coraçons) escutara-se em todo bairro e paróquia, a mais, chegará á fim o streaming.
Levamos canda nós os relatos, os cassetes, os cartazes, o horterismo, mesmo os móveis e os silêncios. Deixamos atrás o que já nom serve para nos armar do que cómpre, procurando sermos reativas ao tempo que criativas.
E velaqui a liberdade (o fazermos o que temos de fazer), a resituaçom. Assim, a recalada no crowdfunding e o ponhérmo-nos pedichonas: umha dívida que lhe pagar á Gentalha (generosa sempre), umha mesa de som e micros novos que mercar e algum gasto derivado da obra que o refugalho nom pode resolver.
Mas, andamos com a energia toda de quem se fai ao mar por vez primeira e cheias de alegria a turrar para que a Kalimera flua. Sabedoras do valor do pro-comum partilhado, do construido por todas, gostariamos imenso de contar com vós, provocar experiência participativa, convencidas que só assim se há criar acçom.
Bogar sinérgico, pois. Contágio kalimero para seguirmos a andar ao mar nas ondas radiofónicas!
Umha vez rematada a mudança e o estúdio em marcha poderemos volver a emitir polas ondas livres de Compostela. Música, informaçom, cultura, debate, autogestom, luta, liberdade... Estás convidada!!
Este projeto vai dirigido a gente que apoia a comunicaçom livre e a liberdade de expressom. Porque a informaçom, a opiniom, a cultura, a música... nom podem estar em mãos duns poucos média, mas nas mãos e nas ondas da gente toda.
O objetivo da campanha é afiançar o projeto da rádio. Melhorar o equipo da rádio, acondicionar o espaço no novo centro social e pagar a dívida acumulada. Ao mesmo tempo queremos celebrar os 25 anos de rádio livre e aproveitar a ocasiom para fazer chegar as nossas ondas a mais gente que partilhe sonhos e ideais. Novas ouvintes, novas colaboradoras, novas vozes, novas mecenas, novas companheiras de viagem, novas amigas...
Rádio Kalimera tem a experiência de 25 anos de programas de rádio, comunicaçom e partilha, contrainformaçom e contracultura (e contracelebraçom todos os anos da Festa Hortera).