http://paperekoa.berria.info/plaza/2014-01-21/036/001/gutxieneko_dirua_lortuta_bigarren_faseari_ekin_dio_irueko_mintzakidek.htm
Gutxieneko dirua lortuta, bigarren faseari ekin dio Iruñeko Mintzakidek
Topaguneak webgune berri bat sortuko du herritarren laguntzari esker lortutako diruarekin
IKER TUBIA IRUÑEA
Ozta-ozta, baina azkenean lortu du. Topaguneak Iruñean antolatzen duen Mintzakide egitasmoak finantzaketa kolektibo bidez jarritako gutxieneko helburua lortu du 107 laguntzaileri esker. Beraz, diru bilketaren xedeak aurrera jarraituko du: webgune berria sortzea, alegia. Lehenbiziko fasea gainditurik, kanpainaren bigarren zatiari heldu diote. 39 egun dituzte diru sarrera lortzeko eta horrekin proiektua nahi bezala egiteko. Dena dela, webgunea eginen dutela esan dute, orain arte lortutakoak aurrera egiteko aukera ematen baitie.
Oskar Zapata Topaguneko Nafarroako arduraduna kontent azaldu da gutxienekoa bete eta biharamunean: «Balorazio izugarri positiboa egiten dugu». Finantzaketa kolektiboaren kanpaina bukatzeko soilik egun bat geratzen zela lortu zituzten falta zitzaizkien 300 euroak, baita pasatu ere. Izan ere, orotara 5.240 euro lortu dituzte, 5.050eko langa aise gainditurik. Zapatak azaldu duenez, horrela izaten da beti gisa horretako kanpainetan. Herritarrek azkenengo momentuan babesten dituzte egitasmoak.
Bigarren fasearen helburua 6.450 euro lortzea izanen da. Dena den, gutxiagorekin ere eginen dute aurrera, lehenbiziko fasea baita dirua jasotzeko gainditu behar dena. «Jaso dugunarekin eginen dugu, eta gehiago lortzen badugu txukunagoa izanen da webgunea», azaldu du Zapatak. Gainera, Topaguneak badu non inbertitu, haren esanetan: «Koska bat falta zaigu benetan behar duguna lortzeko; iristen bagara, aukera gehiago izanen ditugu».
Bestalde, egitasmoak herritarren sostenguarekin aurrera eginen duela nabarmendu du Zapatak. Izan ere, orain arte ere hala egin du. Webgune berria dinamikoa, erabilgarria eta funtzionala izatea nahi dute, baina bada beste helburu bat ere: «Proiektuaren etorkizuna bermatzeko, beharrezkoa dugun dedikazioa finantzatu nahi dugu», azaldu dute www.goteo.org gunean. 39 egun barru burutuko da bigarren fasea. Orduan ikusiko da zer eman duen.